3.8.7 Vaega Manaomia o Nofogamau o Fanau Aoga

Nofoagamau

O nofoaga e nonofo ai fanau iti, e avea lea ma nofoaga faatulafonoina o matua/tausifanau o e o loo vaaia ma tausia fanau iti. E tatau i le matua/tausifanau o le tamaitiiti ona faaauau pea ona nofo i San Francisco i le taimi e apalai ai ma le taimi atoa o le resitala, ina ia mafai ona faitaulia ai le resitala a le tamaitiiti i le SFUSD. E le faaaogaina lenei tulafono i fanau e leai ni fale/nofoaga.

Uiga o le Nofoagamau

Mo le faamoemoega o lenei tulafono, o se tagata nofomau o se tagata e nofo pea i lea nofoaga e tasi i totonu o San Francisco ma e vagana ai le galuega poo le aoga, o le a maua atu pea i lea tuatusi. O tulafono nei e tatau ona vaavaaia pe a fuafuaina se nofoagamau:

1. O se nofoaga e nofomau ai se tasi pe a le malaga atu i se isi nofoaga mo galuega, poo ni mafuaaga tatau ma le tumau, ma e toe foi mai ai lava pe a maea fuafuaga fai.
2. E tatau na o le tasi le nofoagamau
3. E le mafai ona leiloa se nofoagamau pe a le mauaina muamua.
4. O le nofoagamau o le matua/tausifanau e nofo ai le tamaitiiti e lei faaipoipo, o le nofoagamau lea o lena tamaitiiti.
5. E nao le iuni o faatinoga ma faamoemoe e mafai ona suia le nofoagamau.

Afai ua le toe faatasi matua ma us eseese tuatusi e nonofo ai, e tatau ona nofo le tamaitiiti ma le matua o loo nofo i San Francisco mo le 50% pe sili atu o le taimi, ao gasolo le tausaga aoga.

E le avea le nofo le tumau i San Francisco ona o le faamoemoega e auai i aoga a le SFUSD, o se nofoagamau. O se tagata e iai lona fanua ma le fale i San Francisco ae e le nofo ai, e le’o o se tagata nofomau.

Pepa Aloaia e Manaomia

E faatulaga e le Aiaiga a le Pulega a le SFUSD 5111.1 pepa aloaia e tatau mo le faamautuina ai o le nofomau, ma apalai ai e resitala i aoga lautele a le SFUSD.

E manaomia foi pepa aloaia nei pe afai e talosagaina se suiga o le tuatusi mo fanau e fesuiai ma ulufale atu i vasega 6 poo le 9.

Tulaga Faapitoa

E mafai ona faamautuina le nofomau o se tamaitiiti e ala i le sauniaina o pepa aloaia e tatau i le Itumalo, e faaali atu ai o ia o se talavou faasaolotoina o loo nofo i SF; o loo i le vaavaaiga a se isi mai le faamasinoga poo se aiga tausi ua laiseneina, o se aiga laiseneina mo le tausiga o fanau i totonu o SF; o loo tausiaina i se falemai poo se nofoaga o tausiga i SF mo togafitiga o se manaoga faapitoa le tumau; nofo ma se tagata matua o loo tausiaina ia; poo le mauaina o lona ia lava pemita faalevaitumalo. E ono le le taliaina e nisi o aoga se resitala, e iloiloina ma maua ai o loo nofo le tamaitiiti i se tagata e tausia o ia nai lo ona matua, ina ia mafai ona auai ai i lea lava aoga. Ua faatonuina le Pulesili e faatulaga  ituaiga pepa aloaia e faailogaina le taua i Aiaiga a le Pulega

Fanau aoga e le Faamaonia

Soo se tamaitiiti aoga e nonofomau lona aiga i San Francisco, e mautinoa le mauaina o avanoa aoga e aunoa se totogi i le SFUSD. E leai se aiga o le a taofia mai nei avanoa ona o o latou tulaga nonofomau i le atunuu.

Faamaoniga o le Vaega e Nonofo ai/Nofoagamau

E ono faamaonia faaletausaga e le Pulesili poo le ua tofia vaega o nonofo ai fanau aoga, ma toafia kopi o pepa aloaia e faamaonia ai vaega o loo nonofo ai, i faamaumauga tumau a fanau aoga, 

Afai e i ai se mafuaaga e masalomia ai e le Pulesili poo le ua tofia, e sese faamaumauga e tuuina mai e se matua/tausifanau e faatatau i vaega e nonofo ai, poo le le faatuatuaina o faamaoniga, ua i ai le pule i le Pulesili poo le ua tofia e faia taumafaiga uma e talafeagai e fuafua ai le ausia e le tamaitiiti o tulaga tatau o nofomau a le Itumalo. E iai le aia tatau a le SFUSD e faatalosagaina ai pepa aloaia faaopoopo mo/poo le faia ai o se sailiiliga, aua le faamaoniga o vaega o loo nofo ai le tamaitiiti. Ona e mafai ona suia vaega e nonofo ai fanau ma o latou aiga, o le mea lea e ala ai ona faamaonia e le SFUSD nei tulaga i soo se taimi o le tausaga aoga, poo le manaomia foi o faamaumauga e faamaonia ai o loo nonofo pea i le mea e tasi, i nei vaitaimi (faataitaiga: faalemasina, kuata, faaletausaga), pe a talafeagai, e aofia ai le suiga o togi. Ua tofiaina le Faatonu Aoga o le Nofoaga Tutotonu o Faatulagaga Faaleaoaoga, e vaavaaia le faataunuuina o sailiiliga o solitulafono faalenofomau. E ono faaaoga e le Faatonusili o le EPC aufaigaluega a le Itumalo poo tagata sailiili tumaoti e faia nei sailiiliga e tusa ai ma le silasila tonu a le Faatonu o le EPC.

Fanau e Feme’ia’i

Afai e mei le matua/tausifanau o loo ia tausia ma vaavaaia le tamaitiiti, i se tuatusi foi i soo se taimi e maea ai ona apalai mo le resitala, e tatau ona faaoo mai se pepa faatumu o le Suiga o le Tuatusi i le Nofoaga Tutotonu o Faatulagaga Faaleaoaoga, i totonu o le 14 aso e maea ai ona mei. O fanau aoga e mei i fafo atu o San Francisco ae e mananao e auai pea i se aoga a le SFUSD, e mafai ona apalai mo se pemita faalevaitumalo mai le itumalo fou o le eria ua mei i ai. E faataunuuina gasologa o le mauaina o pemita  e tusa ma faatulagaga a le Itumalo.

Afai e le faaooina mai e le matua/tausifanau se pepa faatumu o le Suiga o le Tuatusi i totonu o le 14 aso o le suiga o le nofoaga ua mei ai, o le a soloia le resitala.

Faaleaogaina o Resitala

Afai e faamaonia e le Pulesili poo le ua tofia ia latou sailiiliga e le sa’o le tuatusi, nofoaga, tausifanau poo se isi faamatalaga sese o loo faavae ai le resitala ma/poo le tulaga faaleaoga, o le a faaleaogaina pe soloia le resitala a le tamaitiiti.

Tagata e le Nonofomau

Afai e mauaina e le Itumalo e le nofo le tamaitiiti i totonu o San Francisco, o le a aveeseina le tamaitiiti mai le lisi resitala a le Itumalo ma faatonuina e tatau ona resitala i le itumalo o loo nofo ai le tamaitiiti. Mo le tausaga e tasi pe a maea le faaleaogaina o le resitala, o le a le agavaa le tamaitiiti e apalai mo se pemita faalevaitumalo e auai ai i se isi aoga o loo avanoa i le taimi o e apalai ai, e aofia ai le aoga tomua. E faagasolo nei tusi apalai e tusa ma faatulagaga a le Itumalo.

Tagata Nofomau

Afai e e maua e le Itumalo e nofo le tamaitiiti i San Francisco, ae mauaina se tofiga e faavae i se faamatalaga sese poo le mei mai foi i San Francisco ina ua maea ona mauaina e le Itumalo tulaga le nofomau, o le a aveeseina le avanoa o le tamaitiiti mai le aoga ua tofia i ai ma maua ai faamatalaga sese, ma o le a toe resitalaina i se isi aoga o loo i ai se avanoa i le taimi o le toe resitalaina. * O tagata nofoau ua maea ona faaleaogaina a latou resitala ona o le soliina o lenei tulafono, o le a le agavaa e auai i tulaga faatuanuuina, o le latou filifiliina lea o se aoga toatele, mo le tausaga e tasi talu le soloina o le resitala.

*E tasi le vaega e ono faatagaina ai lenei tulafono o le soliina o lenei tulafono e fanau nofomau ma faatumauina pea a latou aoga tofiaina pe a (1) o se aoga e le toatele e apalai i ai, (2) o loo i ai le avanoa ma e le o tele ni talosaga mo filifiliga i le taimi o le faaleaogaina o le resitala).

O le uiga o “aoga e le toatele resitala”, o le aoga e le i tumu ma e le toatele foi nisi e talosagaina lo latou auai i ai i le amataga o le tausaga aoga. O le “aoga e toatele le resitala” e faatatau i aoga e tutumu ma e tele talosaga e fiaauai ai i le amataga o le tausaga aoga.

O aiga e faamaonia lo latou soliina o lenei tulafono, o le a moliaina mo se taimi ma faasalaina i le totogiina o taimi o le Itumalo e faataunuuina ai nei sailiiliga. E le mafai ona faatagaina pe tuu atu se pemita faalevaitumalo e auai ai i se aoga a San Francisco mo le tausaga atoa e tasi, pe a faaleaogaina le resitala.

E faaopoopo atu i le totogiina o taimi o le Itumalo, le iai o le aia tatau a le Itumalo e tuliloaina ai moliaga faaletulafono faaopoopo faasaga atu i le na faaoo maia faamatalaga sese i le Itumalo ina ia maua ai se avanoa resitala i se aoga a le SFUSD, e aofia ai le leai o ni faatapulaa i faasalaga o le tagi mo le solitulafono a le Malo, Numera 12650 et seq. mo solitulafono o tagi le tonu. E tuuina atu e le Matagaluega le pule i le Faufautua Lautele e foia ai tagi o nofomau sese.

E lafoina atu e le Nofoaga Tutotonu o Tulaga Faaleaoaoga se tusi i matua/tausifanau e faailoa atu ai ia i latou faamaoniga muamua a le Itumalo, e le nofo le tamaitiiti i San Francisco. E faailoa atu e le tusi i matua/tausifanau, o loo masalomia le nofo o le tamaitiiti i fafo atu o San Francisco; lisi le tuatusi o loo masalomia o loo nofo ai le tamaitiiti i fafo o San Francisco; ma faailoa atu foi i matua/tausi fanau lo latou aia tatau e lu’iina ai lenei faamasinoga i totonu o le 7 aso.

Apili Tetee poo le Faaleaogaina o Resitala

Afai e faamaonia e le Pulesili poo le ua tofia, i le maea ai o suesuega, e le ausia e le tamaitiiti tulaga uma e manaomia e avea ai ma se tagata nofomau, ma soloia le resitala a le tamaitiiti i le itumalo, e tatau ona faailoa atu i le matua/tausi fanau se avanoa e apili ai lena faaiuga.