5.5.1 Vaega Faatulagaina o Laei ma Foliga Vaaia

(Tulafono 5132 a le Matagaluega a le SFUSD)

E le tatau i fanau aoga ona laei lavalava e ono iai ni aafiaga i le soifua maloloina ma le saogalemu o isi pe ono faatupu ai ni faafitauli i polokalame faaleaoaoga. E galulue le puleaoga poo le ua tofiaina, faatasi ma faiaoga, fanau aoga ma matua/tausi fanau, i le atinae ma faamautu tulafono e taitai ai laei ma foliga vaaia o fanau aoga. O laei ma foliga vaaia e tatau ona o gatasi ma le tulafono, o aiaiga a le Matagaluega, ma tulafono foi a le pulega. O taiala nei e tatau ona mulimulitai i taimi o gaioiga a le aoga:

1. E tatau ona le iai ni tulaga le talafeagai, upu sa, o ni faamatalaga poo ni ata faafeusuaiga ma le faaaloalo i luga o ofu, mea teuteu poo soo se meatotino faaletagata. E le tatau ona iai ni ata ma faamatalaga e ono faamalosia ai le faaaogaina o fualaau faasaina, tapaa ma isi gaioiga faasaina e le tulafono.
2. E tatau ona laei seevae talafeagai i taimi uma
3. E le tatau ona faaaogaina pulou poo soo se tulaga e ufi ai le ulu i soo se nofoaga i totonu o le faleaoga, vagana ai tulaga o loo i lalo.
4. E tatau ona ufiufi e lavalava e laeiina i fafo, lavalava laiti o loo faia i totonu. E faasaina lavalava e valavala poo le pupuu foi e faalia ai puimanava. E faasa ofu e faaalia ai ogavae poo le nofoi foi.

E mafai ona faia suiga i lenei tulafono o laei e talafeagai ma talitonuga faaleekalesia poo aganuu a nisi o le fanau, poo tulaga tau faalesoifua maloloina, poo se isi lava tulaga e faatagaina ai e le puleaoga poo le ua tofia. E fuafuaina foi e le pule aoga poo le ua tofia tulaga tatau mo laei i polokalame faapitoa a le aoga, o vasega faamalositino, gaioiga afeleti poo isi gaioiga faaopoopo i mataupu aoaoina a le aoga.

E mafai ma faataga fanau aoga ona laei lavalava e puipuia mai ai i le la, e aofia ai pulou mo gaioiga poo vasega i fafo, i taimi o le aoga. (Tulafono 35183.5 a Aoga a Kalefonia)

O le puleaoga poo le ua tofia e iai le pule e faamalosia ai nei tulafono ma faailoa atu i fanau e le o mulimuli ma usitaia le tulafono a laei. E le tatau ona faasaoina se laei poo se solitulafono i le taimi o faatonuga o le vasega ma luma foi o isi tamaitiiti aoga. Ae o le teena o fautuaga mo le tausiaina o lenei tulafono, poo le soli soo o le tulafono, e oo atu ai i ni faasalaga poo taumafaiga e foia ai lenei faafitauli, ae le o le malolo le tumau poo le faateaina mai le aoga.

E le tatau ona faamalosia lenei tulafono o laei, i se auala e faaalia ai le tetee i talitonuga o nisi poo ni lagona faailogatagata, poo le faavaeina foi o se fautuaga i vaega e pei o le itupa o le tamaitiiti, o lana aganuu, faasinomaga, poo le tulaga tau tamaoaiga o le aiga, o le ituaiga tino poo le lapoa foi o lona tino. E le tatau ona faasaina le tamaitiiti mai le laeiina o le itupa e latou te lagona e talafeagai mo latou, poo se talitanuga faaleekalesia poo se aganuu foi.